Linko kopiime! Le ol pästrävǎ prospeto, kirav len haj ćhin len xurdes te aćhel o mas guglo haj pako. Vov del o laćhipen spećialo le zakuskaqe. O pani kaj kiravdili inkeres la, vaś ke and-e zumi aromaça maćhesqi ćhes ol legume. O xamipen maśkar lenθe, miśto kondimentime, ćhores les ande borkanǎ tikne kaś te na xasardǒn ol stratoja gustoça but laćho.
O gusto le zakuskaqo pästrävosqi katar o Nämäieśti na xasardǒl, ama daśtis te les les tuça orikaj. Orsar aćhela ande kiri gogi, vaś ke e Xarr Bari Praväc haj o Arʒeśo si thana save uimien. Von aźukeren tut bute bare bukǎnça, vaj xamasqe, vaj kulturalo.
P-ol droma andar e Xarr Bari Praväc arakhes vi varesode khera musćeleano purane, save uimien ol jakha pande lenqo sadipen haj lenqi paćǎ. Jekh kher kasavo le demisola ućǎrdo haj bangǎrdo, etaźo pridvorěça haj koloane sane, si o Kher Memorialo George Topïrćeanu. O xramosarno beślǎs jekh vremǎ ande kadava than paćǎça de p-o drom le paněsqo Arʒeśel, k-ol pogǎ le plajenqe Jezer. Dikh lesqo kher, saves si les jekh kolekcia muzealo savi phenel pa o ʒivipen haj ol bukǎ kerde le Topïrćeanosθar. Si kathe vi lila andar lesqi biblioteka, lilorre, manuskrisoja, fotografie, arme vïnätorǎqe, bastonǎ.
Maj oprea, sa pe kadava drom, arakhes vi e Mänästirea Nämäieśti. Phenel pes ke, khethanes avre duje mänästirença p-o barr andar o Arʒeś – Ol Korangǎ Barrutne haj e Ćetäcuia, keren jekh triungio drabardo savo del le thanes jekh zor sfïnto. Kon avel te dikhel „O Triungio le Mänästirenqo p-o barr” pherel pes paćǎça haj emociaça laćhi.
K-e Mänästirǎ dajorrenqi andar o Nämäeśti si o skito xunavdo and-o barr pa savesθe pakǎl pes ke sas jekh templo biuźo vaś o devel Zalmoxis. E paramići phenel ke o Apostolo Andrej, ande lesqo drom, le bukǎça te phenel pa e Evangelia, areslǎs kathe haj arakhlǎs jekh templo. Kana dikhlǎs andre kaś te rodel jekh raśaj te bolel les, na dikhlǎs khanikas. Phenel pes je boldinǎs pes atunći karing kodola save sas leça haj phendǎs: „NEMO EST", katar avel vi o anav Nämäieśti.
Ages, and-e khangeri and-o barr, si jekh ikoana kaj kerel bare bukǎ le Devlesqe Dejaqi, savi śaj ke sas piktime katar o Sfïnto Apostolo. Si jekh andar ol maj purane ikoane andar e Romïnia haj cïrdel bute manuśen.
E Mänästirea Nämäieśti si la vi jekh kolekcia muzealo etnografiko kidini katar e Dej Ana Lućia Nedelea. Si xurǎvimata popularo musćeleano maj purane de 150 berśa, andar o than le Arʒeśosqo haj le Tïrgoviśtǎqo, varesave but spećialo. Lenqi paramići, ama vi jekh magazino mänästirǎqo kaj arakhes xamata kerde le dejorrěnθar, but laćhe guglimata, siropoja, kompotoja andar pherra haj plante, aźukeren tut, kuć phirutnea.
Jekh aver than kaj trebul te aćhes kaś te xas thuda but verver si e Ferma Musćeleano Licoi. Si len lenqe guruvnǎ haj keren telemeaua, urda, kaśo thuvǎrdo, kaśkavalo, kiral burdufosqo, smïntïna, thud mardo. Sa lenθe arakhes vi bukǎ andar mas prospeto, muśkiuleco, skärica, ćeafa, slojo, goja, lebäro haj but aver.
Te pućhesa le manuśen, phenena tuqe pa e pästräväria Nämäeśti, jekh than garavdo maśkar ol plaja, and-e paćǎ le veśesqi. Si jekh pästräväria tradiciaça, paněnça pherde pästrävǎ, jekh pani kaj astarel pes maćho sportivo, jekh pani astarimasqe maćho sportivo trine felojença maćho: pästrävo fïntïnel, kurkubeo haj indiʒeno. Haj, te kamesa te xas vareso kaj na bistresa, alosar andar o menio lenqo vareso pästrävoça laćho haj abǎ astardo, vaś ke si len recete vaś orso gusto, sar si e zakuska pästrävosqi, pästrävo and-e malaja, saramura pästrävosqi, plakia pästrävosqi, kifteluce peskärisko, storćeago pästrävosqo haj but aver.
Haj te ćajlǒna tut ol eksperince and-e natura, sa kathe śaj te alosares te keres jekh ekskursia p-o grast xamaça haidućisko, kaś te xas andar o bulzo tradicionalo. Kadja daśtis te lośares tut katar sǎ so si e Xarr Bari Praväc haj ol trujalimata. Haj te na xasares jekh vizita k-o Mausoleo Mateiaś, jekh than śerutno savo anel gogi pa kodola save marde pen kathe and-o Jekhto Lumǎqo Maripen. Si jekh baro monumento vazdino katar o vazdinitori italiano De Niccolo, andar kalkaro katar o Albeśti.
Pala sar dikhes, si but bukǎ kerimasqe and-e Xarr Bari Praväc, e lokaliteta kaj si o purano drom bikinimasqo maśkar o Braśovo haj o purano kher domnisko, o Kïmpulung. Ol surprize aźukeren tut haj ol thana aćhena tuça savremǎ.
Adrese haj linkoja laćhe:
E Pästräväria Nämäieśti
Ʒeno kas te rodes Roksana Vintilä 0744-21.33.20
emailo: contact@pastravarianamaiesti.ro
E Mänästirea Nämäieśti
Than: gav Nämäieśti, e komuna E Xarr Bari-Praväc, 117811, źud. Arʒeś
7 Grasta Nämäieśti - ʒaben p-o grast, astaripen, tabere jekhe gesesqe, xaben haidućisko.
Ʒeno kas te rodes Dan Mosesku (0743) 190 992
Ćentro vaś e ekitacia „Ol Grasta le plajenqe” andar o Lereśti.
Ʒeno kas te rodes Aleksandru Pahoncu (0741) 458 900
Recenzie
Ʒa maj dur le Google
